على اساس ان شفيق كان طاهر وخارج من المعتقلات...؟؟ وكان بيتعذب ياحبة عيني... وكان معارض لمبارك ياناس ومبارك أقاله من الوزاره, وكمان خاف يكلفه برئاسة الوزراء ايام الثوره اصله معارض لمبارك ولا مؤاخذه فكان هيعمل انقلاب وزاري عليه ويمنع البلطجيه من اقتحام التحرير بالجمال والحصنه فقام مبارك اعتقله ياعيني!
والاخوان كانو فى وزارات مبارك, ووقفو ضد الثورة وأعضاء في الحزب الوثني المنحل وفجأه بقو ضد نظام مبارك بعد مالثورة نجحت!! الاخوان كوم ومحمد مرسي دا كوم تانى ياولاه دا فضيحه وبلوى سودا......
ازاى تنتخبو محمد مرسي دا كان رئيس وزراء مبارك وهرب أموال وفلوس المصريين المنهوبه للبنوك والدول الاجنبية بعد الثورة وحرق كل ملفات أمن الدوله وحما نظام مبارك, وبيقول كمان ان ثورة 25 يناير مش ثورة...!!!
بقا تسيبو شفيق الثورى المناضل اللي وقف يدافع عن الثوار يوم موقعة الجمل وقتل واتقتل..!
وتروحو تنتخبو مرسي اللي كان رئيس وزراء الموقعة الشهيرة اللي طلع علينا يقول الحصنه والجمال كانت رايحه ترقص فى التحرير, دا غير انه كان عايز يجيب بون بوني ويوزعه على الثوار رأفة ورحمة على أرواح الشهداء, ودماء المصابين!..
ولنشاهد معا هذا الفيديو
دليل على معارضة شفيق لمبارك وان محمد مرسي دلدول فعلا, وكان بينافق مبارك و مترفه بفلوس الشعب. وبيسوق التوك توك للمخلوع.
ازاى يعني ياأعداء الثورة تنتخبو مرسي وهو بيقول للأسف الثورة نجحت..؟
وازاى متنتخبوش شفيق.. ؟ الراجل كان في المعتقل يوم 11 فبراير وكان متعذب ومتبهدل فى السجون والمعتقلات عشان خرج في مظاهرات ضد نظام مبارك..؟؟!
انا مش اخوني ولا عمرى هكون اخواني او ليبرالي ولا اشتراكي, أو لقلمي انتماء حزبي وأفخر باسلامي الحنيف واستقلاليتي.
كل وقت وليه ادان.
انتبه..! الثورة في خطر وكما يقال في السياسه كل مرحلة وليها متطلباتها.
وان اختلفت مع الاخوان فالأولى فى الوقت الحالي الوقوف معهم ضد عودة نظام مبارك لأن اختلافي معهم فكري, وخلاف سياسي فقط لاخلاف بسبب سرقة او قتل او فساد أو سحل او نهب أو تعرية او نفخ الخخخخ.
الحق أحق أن يتبع, وحسبي الله ونعم الوكيل في كل من يزيف الحقائق من اتباع شفيق وبقايا ومخلفات المخلوع.
0 التعليقات "عندما عارض أحمد شفيق مبارك فاعتقلوه"
إرسال تعليق